CG Poem In Hindi सीजी पोएम - मोर गांव कहां गंवागे संगी Mor Gaon Kaha Gavage Sangi

 CG Poem In Hindi Chhattisgarhi

CG Poem In Hindi सीजी पोएम

मोर गांव कहां गंवागे संगी, कोनो खोज के लावो

भाखा बोली सबो बदलगे, मया कहां में पावों,

काहनी किस्सा सबो नंदागे, पीपर पेड़ कटागे

नइ सकलाये कोनों चंउरा में, कोयली घलो उड़ागे,

सुन्ना परगे लीम चंउरा ह, रात दिन खेलत जुंवा

दारु मउहा पीके संगी, करत हे हुंवा हुंवा,

मोर अंतस के दुख पीरा ल, कोन ल मय बतावों

मोर गांव कहां गंवागे संगी, कोनो खोज के लावो

जवांरा भोजली महापरसाद के, रिसता ह नंदागे

सुवारथ के संगवारी बनगे, मन में कपट समागे

राम राम बोले बर छोड़ दीस, हाय हलो ह आगे

टाटा बाय बाय हाथ हलावत, लइका स्कूल भागे,

मोर मया के भाखा बोली, कोन ल मय सुनावों

मोर गांव कहां गंवागे संगी, कोनो खोज के लावो,

छानी परवा सबो नंदावत, सब घर छत ह बनगे

बड़े बड़े अब महल अटारी, गांव में मोर तनगे

नइहे मतलब एक दूसर से, शहरीपन ह आगे

नइ चिनहे अब गांव के आदमी, दूसर सहीं लागे,

लोक लाज अऊ संसक्रिती ल, कइसे में बचावों,

मोर गांव कहां गंवागे संगी, कोनो खोज के लावो

धोती कुरता कोनों नइ पहिने, पहिने सूट सफारी

छल कपट बेइमानी बाढ़गे, मारत हे लबारी

पच पच थूंकत गुटका खाके, बाढ़त हे बिमारी

छोटे बड़े कोनों मनखे के, करत नइहे चिन्हारी,

का होही भगवान जाने अब, कोन ल मय गोहरावों,

मोर गांव कहां गंवागे संगी, कोनो खोज के लावो

जगा जगा लगे हाबे, चाट अंडा के ठेला

दारु भटठी में लगे हाबे, दरुहा मन के मेला

पीके सबझन माते हाबे, का गुरु अऊ चेला

लड़ई झगरा होवत हाबे, करत हे बरपेला,

बिगड़त हाबे गांव के लइका, कइसे में समझावों

मोर गांव कहां गंवागे संगी, कोनो खोज के लावो,,

संगवारी मन ला हमर यह लिखे गए पोस्ट ह कैसे लगीस कमेंट के माध्यम से जरूर बताहू औउ एला दूसर के संग शेयर करेला भुलाहु मत.

आप मन एला व्हाट्सएप औउ फेसबुक टि्वटर या टेलीग्राम जैसे सोशल मीडिया म शेयर कर सकत हव,

जेकर से यह छत्तीसगढ़ के कोना-कोना म पहुंच सके,अउ सब्बोजन एकर पढ़ के आनंद ले सके.